LAOAG CITY – Kinumpirmaran ni Barangay Chairman Elmer Lorenzo iti Barangay 44, Zamboanga nga adda ti tallo a lalaki a na-stranded iti karayan.
Segun kenni Lorenzo, itay parbangon ket napan kinita ni Danny Pablo dagiti taraken na iti karayan a nakaiwaywayan da ngem saanen a nakasubli iti balay da gapo iti nangato a lebel ti danom.
Inlawlawag na nga adda pay ti dua a lallaki a napan dimmanon iti ayan ni Pablo rason a tallo da a na-stranded.
Nupay kasta, agpapan maisursurat ti damag ket narigat pay laeng a madanon ti danom iti ayan dagiti tallo a lallaki ngem saan da a makaballasiw gapo ta danom amin ti lawlaw na ken naapres.
Kabayatanna, kuna ni Lorenzo a nasurok a 20 a pamilya ti sinerrek ti danom iti uneg ti balay da a rason ti panagipangato da ti kagamitan da.
Binalakadan na pay dagiti kabarangayan na a nawaya da a mapan iti Barangay hall nga isu ti evacuation center no kumaro ti sitwasyon.
