LAOAG CITY – Natiliw dagiti tallo a tattao gapu ti iligal a panagay-ayam da ti tong-its iti maysa nga apartment iti Brgy. 1 San Francisco, iti ili ti San Nicolas.
Segun ti PNP San Nicolas, naiyuswat ti panagsusugal da iti maysa kadagiti kuarto ti apartment a kukua ti agtawen ti 64 idinto a karaman a natiliw ti agtawen ti 34 a construction worker a residente iti Brgy. 15 ken ti agtawen ti 35 a reseller ti dry goods ken residente iti Brgy. 20 San Pablo iti nasao nga ili.
Nakumpiskar dagiti otoridad ti nausar a baraha, ti pusta a nasurok uppat a ribo a pisos, betting chips, lamisaan ken dagiti nagtugawan dagiti tallo a natiliw.
Inmatangan ni Barangay Chairman George Palafox ti pannagimbentaryo dagiti otoridad kadagiti naskumpiskar nga ebidensya.
Gapu iti daytoy, nagtalinaed da iti kustudyar ti PNP San Nicolas bayat a maisagsagana ti maipila a reklamo kontra kadakuada.
Immunan a nakaawat dagiti kameng ti PNP San Nicolas ti impormasyon manipud iti maysa a concerned citizen seknan iti aktibidad dagiti tallo a suspek.
