LAOAG CITY – Natiliw dagiti tallo a wanted person iti ili ti Vintar babaen kadagiti naiparuk-at a warrant of arrest.
Segun kenni Police Captain Suerte Obungen, hepe ti PNP Vintar, umuna a natiliw ti babai nga agtawen ti 36, naasawaan ken residente iti Brgy. 33 Cabayo iti nasao nga ili.
Natiliw ti akusado iti pagnanaedan na iti Brgy. 1 iti nasao nga ili babaen ti bileg ti Warrant of Arrest gapu ti kaso nga estafa.
Nairekomendar ti 108 a ribo a pisos a pyansa ti akusado para ti temporaryo a pannakawaya-waya na.
Simmaruno a natiliw ti barangay tanod, agtawen ti 38, ken residente iti 18 Abkir iti nasao nga ili gapu ti kaso na a direct assault.
Nairekomendar a makapagpiyansa ti tanod iti 12 a ribo a pisos para ti temporaryo a pannakawaya-waya na.
Naudi a natiliw ti babai nga agtawen ti 48 ken residente iti Brgy. 17 PF Alviar iti nasao nga ili gapu ti kaso nga estafa.
Nairekomendar a makapagpiyansa ti akusado iti 72 a ribo a pisos para ti temporaryo a pannakawaya-waya na.
Amin nga akusado ket nagtalinaed iti kustudyar ti PNP Vintar para ti pannakisagana dagiti dukomento sakbay a maipaima dagitoy kadagiti korte a naggapuan ti warrant of arrest.
