(Update) LAOAG CITY – Kinumpirmaran ni Barangay Chairman Sammy Aquino iti Barangay 24 ditoy ciudad ti Laoag a napilaan dan ti kaso a palsification of document da Madelyn Asuncion, dati a secretary iti Barangay da, Fe Nicolas ken ni Julie Natividad.
Daytoy ket gapu ti maipagarop a panangperma da lattan ti sertipikasyon manipod iti barangay nga inusar da a nag-loan.
Immunan a dimmawat da Asuncion ti sertipikasyon ken ni Kapitan Aquino ngem saanna nga inikkan dagiti maseknan gapu ta saanna a kayat ti mangted ti sertipikasyon no para loan.
Gapu ti daytoy, maipagarop a ti inusar dagiti maseknan ket ti dati a sertipikasyon ti barangay a saan nga inturnover ni Asuncion kalpasan a nasukatan kas sekretaryo ti barangay da.
Inpetteng ti kapitan a tinulad da Asuncion ti perma ti agdama a Barangay Secretary a ni Jayson Miguel.
