LAOAG CITY – Natiliw dagiti tallo a tattao gapu iti panangipresentar iti peke nga antigen test result iti border control iti ili ti Badoc.
Immuna a natiliw dagiti dua a lallaki, maysa a truck driver, agtawen ti 34 a residente iti Mabalas-las San Rafael Bulacan ken ti pasahero na nga agtawen ti 25 a residente iti Gulod Maginaw, San Rafael Bulacan.
Naduktalan dagiti otoridad a saan nga orihinal ti pirma ti nangeksaminar a medical technician kadagiti maseknan.
Kalpasan ti sumagmamano nga oras, natiliw met ti maysa a private employee nga agnanaed iti Brgy. 9 Sta. Angela ditoy siudad.
Iti pannakasada na iti border control babaen kadagiti otoridad ken kameng ti Office of the Barangay Affair iti gobyerno probinsyal, naduktalan a saan nga orihinal ti pirma ti nangeksaminar a medical technician iti maseknan.
Naamoan a naiscan wenno photocopy ti naipresentar a dukomento.
Naipan dagit tallo a natiliw iti kustudyar ti PNP Badoc para iti pannakaipila ti panagsalungasing iti Art 172 iti Revised Penal Code wenno Falsification by Private Individuals and use of Falsified Documents.
