LAOAG CITY – Agtultuloy ti imbestigasyon seknan iti napasamak a panagobor kadagiti tallo a lugan iti national highway a paset ti Bgy. Caraitan iti ili ti Badoc.
Segun iti PNP-Badoc, agtultuloy ti panangbigbig da kadagiti dua a naglubbon iti maysa a motorsiklo a dagitoy ti mapapati a makin-aramid ti nasao a panagobor.
Maipalagip a dagiti naubor ket Fariñas Bus nga addaan ti Body no. 8 ken Plate no. UVY-565 ken inturong ni Eufenio Sebastian Jr. agtawen ti 42 ken agindeg iti Brgy. 43 Cavit, ditoy Laoag City, Trailer Truck space cruiser nga addaan ti plate No. RFK-500 nga inturong ti agnagan ti Reynante Baysac, agtawen ti 45, naasawaan ken agindeg ti Brgy. 33 Nagbacalan, Batac City, ken ti Isuzu 10 Wheeler nga inturong ni Ramir Rodriguez agtawen ti 48 naasawaan ken agindeg iti Brgy. Banca banca, San Rafael, Bulacan.
Naboboong dagiti makinsango a sarming batog ti driver ti Fariñas bus ken ti trailer truck idinto a ti 10 wheeler truck ket ti sarming iti batog ti pasahero babaen kadagiti nasao a suspek.
Naamuan nga agpapaabagatan a direksiyon dagiti nabakal a lugan idinto nga agpapaamyanan met a dirersiyon dagiti suspek idi mapasamak ti insidente babaen iti pannakaaramat ti botelya.
Awan met ti nadangran kadagiti pasahero kadagiti nadakamat a behikulo.
Immuna metten a nagpannawagan ti PNP ti itutulong dagiti umili a mangsulbar ti nasao a panagubor ken nangidiaya da payen iti “reward money” a 50 a ribo a pisos iti makaitudo weno makaited ti impormasyon kadagiti suspek.
