LAOAG CITY – Natiliw dagiti tallo nga agkakabagyan iti Brgy. 11 San Fernando iti ili ti San nicolas gapo iti iligal a panagsugal.
Binigbig ni Pol. Maj. Eduardo Santos, ti hepe ti Philippine National Police San Nicolas dagiti suspek nga isuda Evelyn Ildefonso y Dela Cruz, agtawen 69, balo ken ni Pacencia Tolentino y Dela Cruz, agtawen ti 72, naasawaan ken ni Marife Dela Cruz y Pullido, agtawen ti 50, agkakabagyan ken agpapada a residente iti nasao a barangay.
Segun ken ni Santos, immuna a naireport iti opisina da ti iligal nga aktibidad dagiti suspek rason a naiyuswat ti illegal gambling operation.
Kuna na a dita a naaktoan dagiti otoridad iti uneg ti pagtaengan ti maysa kadagiti suspek ti panagay-ayam dagitoy ti tong-its.
Gapo iti daytoy, nakumpiskar dagiti awtoridad ti 52 a pedaso ti playing cards, maysa a lamisaan, maysa a table cloth, tallo a tugaw, tallo a pedaso ti 500 peso bill, lima a pedaso ti 100 peso bill, lima a pedaso ti 50 peso bill, siyam a pedaso ti 10 peso coin, 10 a pedaso ti 5 peso coin, pito pisos ken maysa a binting wenno kabuklan a P2,397.25
Inpakaammo ti hepe a manamnama a sumango dagiti suspect iti kaso a panaglabsing ti PD 1602 wenno illegal gambling law.
