LAOAG CITY – Indeklarar ni Nigerian President Bola Tinubu ti tallo nga aldaw a panagladingit kalpasan a nagswek ti military aircraft iti southern Ondo State, a nakatayan ti 25 a tattao.
Immunan nga inrakurak ni Aviation Minister Festus Keyamo a 32 a tattao ti natay, ngem linawlawagan ti Air Force a 25 nga indibidual laeng ti pimmusay, pakairamanan ditoy ti lima a crew ken 20 pasahero.
Inbatad dagiti otoridad a ti eroplano ket adda iti routine mission manipod iti Benin City ken agturong koma iti Lagos idi napasamak ti insidente.
Daytoyen ti maibilang kas “deadliest crash” a nakairamanan ti Nigerian military aircraft sipud idi 1992.
Inparuk-at metten ti Nigerian Air Force ti nagan dagiti biktima no sadinno a 19 kadagitoy ket military personnel.
Indanun ni Presidente Tinubu ti pannakipagladingit na iti pamilya dagiti biktima ken inbilin na ti naan-anay nga imbestigasyon iti napasamak.
Inbilin pay ti presidente ti pannakaikabil iti half-mast ti bandera ti pagilian da kas panangrespeto da kadagiti pimmusay.
