LAOAG CITY – Natay dagiti tallo nga estudyante iti Uganda kalpasan a naidungpar ti maysa a truck iti classroom da iti ciudad ti Kampala.
Malaksid kadagiti natay ket umabot met iti 18 a sabsabali dagiti nasugatan iti insidente a napasamak iti Kasaka Secondary School.
Basar iti imbestigasyon dagiti otoridad, napukawan ti kontrol iti manibela ti driver ti truck a nangitunda ti pannakaidungpar na nga immuna iti alad ti pagadalan ken nagderetso iti maysa a classroom kangrunaan na iti computer laboratory nga ayan dagiti sumagmamano nga estudyante.
Gapu iti napasamak, napagawid a dagus dagiti amin nga estudyante iti nasao a pagadalan ken nasuspenso paylaeng ti klase da iti uneg ti maysa a lawas.
Mainaig iti daytoy, natiliw met a dagus ti agtawen ti 26 a driver kalpasan ti insidente.
