LAOAG CITY – Inrakurak ni Atty. Franklin Calumag, City Administrator ditoy siudad ti Laoag a saan a karaman a maipawil a sumurot nga agkampania dagiti tallo nga Executive Assistant ti Local Chief Executive ditoy siudad ti Laoag.
Segun kenkuana, dagiti nasao a tallo nga indobidual ket maibilang a confidential staff ti Mayor nga agserserbi kas Executive Assistant.
Inlawlawagna a no makitkita man a makikuykuyog a mapan agkampania dagitoy kaduada ti Mayor ket awan ti problema gapu ta isuda ket maibilang a confidential staff ken non-partisan.
Mainaig iti daytoy, inpakaammo ni Ms. Felicar Ancheta, Human Resource Management Officer iti lokal a gobierno ditoy siudad ti Laoag a naipalaon iti Joint Circular No. 001 series of 2016 ti Commission on Elections ken Civil Service Commission dagiti indibidual a maipalubos a makipaset kadagiti kampania ita nga eleksion.
Inbatadna a basar iti Joint Circular, nakailanad a karaman ti Presidente ken Bise Presidente, miembro ti gabinete, elective public officials, personal ken confidential staff ti kandidato ken dagiti miembro ti reserve corps ti Armed Forces of the Philippines.
Innayonna a masapol pay a liklikan nga aramiden dagiti empleado ti gobierno ti panagusar it isocial media platform kas ti saan a panag-post, share ken comment kadagiti political content dagiti kandidato ken saan nga agusar kadagiti government issued devices iti panagkampania ken liklikan ti political discussions.
Maipalagip nga immunan a kiniddaw ni ABC Presidente Rbee Ablan kabayatan ti regular session ti Sangguniang Panlungsod a mapalagipan dagiti empleado ti lokal a gobierno nga agbalin a non-partisan ita nga eleksion gapu ta mamati daytoy nga adda dagiti nakalipaten iti daytoy.
Kabayatanna, nasaludsod ti Presiding Officer ti Sangguniang Panlungsod iti agdama a situasion ti Mayor ditoy siudad ti Laoag a no maipalubos ti asawana a maysa nga empleado ditoy siudad ket mabalin a makipaset iti kampania.
