LAOAG CTY – Naarestar dagiti otoridad ti tallo a residente iti Brgy. Callaguip iti ili ti Paoay, gapu iti panaglabsingda iti Presidential Decree 1602 wenno ti Illegal Gambling Law.
Segun ken ni P/Cpt Jackson Sugayen, hepe ti Paoay Municipal Police Station, dagiti natiliw ket da Rhemalyn Ragusante, agtawen ti 36; Leslie Almazan, agtawen iti 47; ken Maribeth Gudoy, agtawen ti 45, balo ken agpapada a residente iti nadakamat a lugar.
Basar iti imbestigasion, adda ti nangireport iti biang ti otoridad nga agay-ayam dagiti tallo nga ina ti “tong-its” iti pagtaengan ni Almazan iti Brgy. Callaguip iti ili ti Paoay, rason nga insigida a nangiwayat dagiti kameng ti polisya ti Anti-Illegal Gambling Operation.
Nakumpiskar manipiud kadagiti tallo nga indibidual dagiti nagduduma a gambling paraphernalia kas ti baraha ken pakairamanan ti nasurok sangaribu a pisos a mapapati a nausar kas pusta.
Kabayatanna, manamnama a mapilaan dagitoy kaso a panaglabsing iti Presidential Decree 1602 wenno ti Illegal Gambling Law.
