LAOAG CITY – Kinumpirmaran ni Dr. Alfredo Domingo, ti Municipal Health Officer iti ili ti Paoay nga adda ti tallo a maibilang a secondary exposure iti nagpositibo iti UK variant a residente iti ili ti Pasuquin.
Segun kenni Domingo, dagiti nasao nga indibidwal ket secondary exposure gapo ta ti nakapulapol da ket ti nurse a nagtaming iti nagpositibo iti UK variant.
Nupay kasta, kuna ni Domingo a dagiti indibidwal ket dagus met a naipan iti quarantine facility kas panangsurot iti protocol.
Kabayatanna, ibilang ni Domingo a natalged ti ili ti Paoay seknan iti covid-19 gapo ta saan met a nakasangpet dagiti indibidwal no diket nai-quarantine dagitoy.
Malaksid iti daytoy, inpakammo ni Domingo nga iti agdama ket awanen ti aktibo a kaso ti covid-19 iti ili da gapo ta ti kaudian a nagpositibo iti virus ket nagnegatibon iti swab test na ngem masapol pay laeng nga ag-quarantine iti pito nga aldaw.
