LAOAG CITY – Natay ti tallo nga indibidual kalpasan a binagkong ti bukodda a pamilya idiay Baldwin Park home, California.
Iti pannaki-uman ti Bombo Radyo Laoag ken ni Bombo International News Correspondent Ray Ortal Villlanueva idiay California, naaresto ti agtawen 23 a lalaki kalpasan a binagkong-bangkongna ti tallo nga indibidual a kapamilya na.
Segun kenkuana, dagiti biktima ket ni Mia Chantelle Narvaez, agtawen ti 8, Paul Sebastian Manangan agtawen ti 16 ken ni Rona Nate nga agtawen ti 44 idinto a ti suspek ket ti anak ni Nate nga agpapada a residente iti Baldwin Park home, California ken tubo iti Brgy. Baay iti suidad ti Batac.
Kinuna a nakalasat iti nadakamat a krimen ni alyas Luck Angel, agtawen ti 6 ken kabsat ti suspek a nagkiddaw ti tulong kadagiti karrubana.
Inadmitir ti nanang ti biktima a ni Rona, nga agararamat ken naigamer iti maiparit nga agas ti apoko na ken masansan nga agsubsubang ti ina ken suspek gapu pay laeng ti epekto ti droga.
Mainaig iti daytoy, napasamak ti krimen idi ala-sais kinse iti rabii idi Disiembre 27, nu pay kaste ket dagos a naarestar ti suspek babaen iti Baldwin Park Police ken Los Angeles Police ken napilaan ti kaso a multiple murder.
Kabayatanna, maladingitan ti kabagian dagiti biktima ditoy siudad ti Batac kalpasan ti napasamak a pammagkong idiay Baldwin Park home, California.
Nupay kasta, dinawat ti kabagian dagiti biktima ti naan-anay a panagulimek ken saanen pay nanagipaay iti kanayonan nga impormasion.
