LAOAG CITY – Manamnama a mapilaan dagiti tallo nga indibidual ti panaglabsing iti Presidential Decree 705 wenno ti Forestry Reform Code of the Philippines kalpasan a natiliw dagiti otoridad gapu iti panagibiyahe da kadagiti tinablon a kayo nga awan ti umiso a dokumento da iti ili ti Dumalneg.
Daytoy ti inbatad ni Police Capt. Jackson Sugayen, ti chief of police iti ili ti Dumalneg.
Binigbig ni Sugayen dagiti suspek nga isuda Armando Garvida, agtawen ti 45, naasawaan, Rogelio Paganao, agtawen ti 56, naasawaan ken agpada a residente iti Barangay Quibel iti ili ti Sumalneg, ken ni Nolan Domingo, 28, addaan ti live-in ken residente iti Barangay Kalaw iti isumetlaeng nga ili.
Inpakaammo ni Sugayen a dagiti nakumpiskar a tinablon a kayo ket pakairamanan ti maysa a pedaso ti 3x13x16, tallo a pedaso ti 2x13x7, maysa a pedaso ti 2x9x7, dua a pedaso ti 2x6x7 ken dua a pedaso ti 1x16x16 a mapatta-patta nga agbalor ti 7,440 a pisos.
Kuna na a dagiti tinablon a kayo ket inlugan dagiti suspek iti kurung-kurong nga awan ti plate number na ken iti pannakasita dagitoy ket awan pulos ti naipakita da a dokumento.
Inpasidong a dagus dagiti otoridad dagiti nakumpiskar da a tinablon kayo iti Community Environment and Natural Resources Office (CENRO) iti ili ti Bangui.
