LAOAG CITY – Naarestar dagiti tallo nga indibidual gapu iti iligal a panagsusugal iti maysa a minatayan iti Brgy. Juan iti ili ti Solsona.
Segun ken ni P/Capt. Randy Damo, Hepe ti Philippine National Police iti nasao nga ili, nabigbig dagiti suspek iti naiwayat nga Anti-Illegal Gambling Operation nga isuda Wilson Juan, agtawen iti 63, addaan ti live in partner, mannalon, June Concepcion, agtawen iti 65, tubo idiay Cagayan ken Richard Briones, agtawen iti 31, naasawaan, driver nga agpapada dagitoy nga agnanaed iti Brgy. Juan iti ili ti Solsona.
Inbatadna a balligi a natiliw dagiti maseknan nga indibidual kalpasan a naaktuaran dagiti otoridad nga agay-ayam dagitoy ti Lucky 9.
Kunana a nakumpiskar ti baraha pakairamanan ti 6,315 a pisos a mapapati a nausar kas pusta dagiti suspek kabayatan ti panagay-ayamda iti sugal.
Naammoan nga adda pay dagiti sumagmamano nga indibidual ti nakalibas ngem saanen a mapilaan ti kaso kalpasan nga awan ti tumakder a saksi a mangipaneknek a karamanda iti iligal a panagsusugal.
Innayonna a manamnama ti pannakaipila ti kaso kontra kadagiti suspek gapu iti panaglabsingda iti Presidential Decree No. 1602 wenno ti Illegal Gambling Law.
