LAOAG CITY – Tallo nga inidibidual ti nasugsugatan kalpasan a nagdinnungpar ti dua a motorsiklo iti C5 road iti paset ti Brgy. 20-San Jose iti ili ti Sarrat.
Basar iti imbestigasyon ti PNP Sarrat, agpapadaya a direksyon ti suzuki rider nga inturong ti agtawen ti 31 a residente iti Brgy. 31 iti siudad ti Batac ken addaan ti lubbon a residente iti Brgy. 21 iti nasao a siudad.
Kabayatanna, agpapalaud a direksyon ti Kiwi motorcycle nga inturong ti agtawen ti 32 ken residente iti Brgy. Espiritu iti ili ti Dingras idi ta kellaat a nagleft-turn nga awan ti signal na wenno saan a nagflasher.
Gapu iti daytoy, saan a naripar ti suzuki rider nga agleft turn ti kiwi isut gapu na nagdinnungpar da iti kalsada.
Nagsagaba ti sugat iti nagduduma a paset ti bagi dagiti dua a naglugan iti suzuki rider idinto a natukkol ti akin kannawan a saka ti driver ti kiwi.
Naitaray dagiti naglugan iti suzuki rider iti Dingras District Hospital idinto nga iti Governor Roque Ablan Senior Memorial Hospital (GRASMH) ti nakaitarayan ti driver ti Kiwi.
Iti agdama ket saan pay a nakapagsarita dagiti agsinumbangir a partido seknan iti napasamak nga insidente.
