LAOAG CITY – Nasugatan dagiti tallo nga indibidual kalpasan a napukawan ti preno ti nagluganan da a trailer truck iti Barangay Baruyen iti ili ti Bangui.
Binigbig ni Police Captain Marlon Lorenzo, ti chief of police ti Philippine National Police iti ili ti Bangui dagiti biktima nga isuda Rio Ramirez nga isu ti driver ken dagiti kakadua na a ni Gregorio Castillo ken Nestor Doner.
Kunana nga iti imbestigasyon da ket agpaamayan wennp agsalog ti trailer truck a nakarga ti crane iti nasao a barangay idi nadlaw ti driver a naawanan ti preno.
Gapo iti daytoy, inbatad na nga insakripisyo ti driver nga idungpar ti lugan da iti kaykayo nga adda iti igid ti kalsada tapno awan ti sabali a mairaman.
Kas resulta, natukkol ti akin-kannigid a saka ti driver idinto a dagiti kakadua na ket nasugatan ti rupa da ken naitaray dagitoy iti Bangui District Hospital ngem naiyakar iti Mariano Marcos Memorial Hospital and Medical Center iti ciudad ti Batac.
Naamoan a dagiti biktima ket naggapo idiay Tondo, Manila ken mapan da kuma iti ili ti Pagupud.
Kabayatanna, agpapan maisursurat ti damag ket narugyan metten ti pannakaikkat ti trailer truck ken crane iti nasao a kalsada.
