LAOAG CITY – Nasugatan dagiti tallo nga indibidual kalpasan ti panagdinnungpar ti kurong-kurong ken motorsiklo iti Brgy. Juan, Solsona, Ilocos Norte
Nabigbig ti nangiturong ti kurong-kurong a ni Edgar Agustin, agtawe ti 56, mannalon ken residente iti Brgy. Darasdas, Solsona idinto a dagiti nagkalubbon iti motorsiklo ket isuda Maynard Flores ken Christopher Reyes, agpada nga agtawen ti 23 ken residente dagitoy iti
Brgy. Bagbag iti nasao nga ili.
Segun kenni Police Captain Randy Damo, ti chief of police ti Philippine National Police iti ili ti Solsona, agpaamyanan ti kurong-kurong idinto a ti motorsiklo ket agturong met iti abagatan.
Inbatad na nga idi nakadanon iti kurbaan a paset ti kalsada ket immagaw iti linya ti motorsiklo isut gapo na a nadungpar na ti kasinnabat na a kurong-kurong.
Kas resulta, nagsagaba ti sugat iti nagduduma a paset ti driver ti kurong-kurong idinto a ti dirver ti motorsiklo ket nagsagaba ti sugat iti ulo ken ti kinalubbon na ket minor injuries.
Naiataray dagiti biktima iti Rural Health Unit iti ili ti Solsona ngem ti driver ti motorsiklo ket naiyakar iti Mariano Marcos Memorial Hospital and Medical Center iti ciudad ti Batac para iti naan-anay a pannakataming na. Kabayatanna, agtultuloy ti imbestigasyon dagiti otoridad seknan iti nasao nga insidente
