LAOAG CITY – Natiliw dagiti tallo nga indibidual gapu iti illegal a panagsusugal iti paset ti Guiron St. ti Brgy. 7-B ditoy ciudad ti Laoag.
Daytoy ket kalpasan ti balligi a naiyuswat nga Anti-Illegal Gambling Operation ti Philippine National Police ditoy ciudad.
Segun ken ni Police Master Sergeant Jayson Domingo ti PNP Laoag, dagiti suspek ket isuda Teresita Cervantes y Vihega, agtawen ti 59, naasawaan, tubo idiay Dagupan, Pangasinan ngem agdama nga agnanaed ti Brgy. Tanap iti ili ti Burgos; Grace Flores y Ramirez, agtawen ti 59, balo ken residente ti Brgy. 7-A ditoy ciudad ti Laoag; ken ni Constantino Valdez Jr. y Garringo, agtawen ti 33, awanan asawa, tubo idiay Galimuyod, Ilocos Sur ngem agdama nga agnanaed iti Brgy. 7-A ditoy ciudad.
Inbatad na a naaktuan dagiti otoridad nga agay-ayam dagiti tallo nga indibidual ti tong-its.
Kunana a nakumpiskar dagiti otoridad ti playing cards nga inusar dagiti suspek iti panagsugal, maysa a lamisaan, tallo a tugaw a monoblock ken ti kuarta a nagbalin a taya dagitoy nga agdagup ti 351 a pisos.
Inlawlawag na a saan na met a masinunuo no siasino ti akinkukua ti pagtaengan a nagay-ayaman dagiti suspek.
Innayon na nga iti agdama ket nagtalinaed iti kustodyar ti PNP Laoag dagiti maseknan para iti naan-anay a pannakaimbestigar da.
