LAOAG CITY – Natiliw dagiti tallo nga indibidual kalpasan a naaktuaranda nga agay-ayam iti iligal a panagsusugal iti Sitio Caldaan, Brgy. 11 Catagtaguen iti ili ti Banna.
Basar iti Philippine National Police iti nasao nga ili, nabigbig dagiti suspek nga isuda Rizalito Dadis Jr. y Colobong, agtawen iti 40, awanan asawa, construction worker, residente iti nasao met laeng a barangay, Richard Taysa ken Dominic Pasion idinto nga adda pay ti uppat nga indibidual ti nakalibas.
Gapu iti daytoy, nakumpiskar dagiti otoridad ti tallo a pedaso ti Fifty Peso Bill, dua a pedaso ti One Hundred Peso Bill, maysa a pedaso ti Twenty Peso coin, dua a pedso ti Five Peso Coin nga adda ti pakabuklan a 380 a pisos ken dadduma pay a nausar iti panagsusugal.
Kabayatanna, iti agdama ket nagtalinaed pay laeng iti pagbaludan dagiti maseknan a suspek.
