LAOAG CITY – Natiliw dagiti tallo nga indibidual gapu iti illegal a panagsusugal da iti Sitio Panaboan, Barangay Pasiocan iti ili ti Bacarra.
Ti operasyon ket inyuswat ti nagtipon a pwersa ti Philippine National Police iti ili ti Bacarra ken ti Provincial Mobile Force Company.
Basar iti report, dagiti natiliw a suspek ket agtawen ti 33 ken 53, agpada a tricycle driver ken residente dagitoy iti Sitio Panaboan, Barangay Pasiocan iti ili ti Bacarra idinto a ti maysa ket agtawen ti 33 a residente met iti Barangay San Gabriel iti nasao nga ili.
Inbatad ti Provincial Mobile Force Company nga adda ti naidanun kadakuada a report a minalem nga adda ti maisaysayangkat a panagsusugal iti nasao a lugar isut gapuna a nangiyuswat da ti operasyon.
Iti pannakaiyuswat ti operasyon ket naaktwaran dagiti otoridad ti panagay-ayam ti tong-its dagiti suspek.
Nakumpiskar dagiti otoridad iti lugar ti lamisaan, tugtugaw, mysa a set ti baraha ken ti 1,141 a pisos a maipagarop a pusta dagiti suspek.
Nagtalinaed dagiti suspek iti kustodyar dagiti otoridad ken manamnama ti pannakaipila ti kaso nga illegal a panagsusugal kontra kadakuada.
