LAOAG CITY – Natiliw dagiti tallo nga indibidual gapu iti illegal a panagsusugal da iti Brgy. Pagsanahan Sur iti ili ti Badoc.
Nabigbig dagiti suspek nga agtawen ti 54, babai, awanan ti asawan; agtawen ti 29, naasawaan, housewife ken ti agtawen ti 73, naasawaan, mannalon, agpapada dagitoy a residente iti nadakamat a barangay.
Basar iti Philippine National Police, nakaawat da ti impormasyon nga adda ti agsusugal iti likud ti balay ti maysa a residente iti nadakamat a barangay rason a nagresponde a dagus dagiti otoridad a nakaaktwan da kadagiti suspek a manarimaan ti panagay-ayam da ti “tong-its”.
Nakumpiskar dagiti otoridad iti lugar ti maysa a set ti baraha, maipagarop a pusta dagiti suspek nga umabot iti 5,405 a pisos, tallo a tugaw, maysa a lamisaan a naarpawan ti puraw a tela.
Iti agdama, maisagsaganan ti maipila a reklamo a panaglabsing ti Presidential Decree (PD) 1602 wenno illegal a panagsusugal kontra kadagiti suspek.
