LAOAG CITY – Natiliw dagiti tallo nga indibidual gapu iti illegal a panagsusugal iti Purok Barikir, Brgy. Utol iti ili ti Bangui.
Nabigbig dagiti suspek nga agtawen ti 36, awanan ti asawa, mannalon, resident ti Brgy. Dadaor iti ili ti Bangui; agtawen ti 36, awanan ti asawa, unemployed, resident ti Brgy. San Lorenzo iti ili ti Bangui ken ti agtawen ti maysa a construction worker, naasawaan ken residente ti Brgy. Quibel iti ili ti Dumalneg.
Basar iti Philippine National Police iti ili ti Bangui, nakaawat da ti report mainaig iti maipagarop nga adda ti agsusugal iti lugar rason a nagresponde da a dagus no sadinno a naaktwan da dagiti tallo a suspek ken sumagmamano pay a kakadwa da nga agay-ayam ti “Lucky 9”.
Naamoan a tallo laeng ti natiliw dagiti otoridad gapu ta dagiti dadduma ket nakataray idi nakita da dagiti otoridad.
Nakumpiskar dagiti otoridad iti lugar ti 605 a pisos a maipagarop a pusta dagiti suspek, maysa a lamisaan ken ti arpaw na a tela, uppat a tugaw ken ti 12 a pedaso a baraha.
Maisagsaganan ti reklamo a maipila kontra kadagiti suspek.
