LAOAG CITY – Natiliw ti tallo nga indibidual gapu iti panagsugalda iti Barangay 28 Surong iti ili ti Pasuquin.
Segun ken ni P/Maj. Jonevale Maramag, Hepe ti Pasuquin Municipal Police Station, nabigbig dagiti suspek nga isuda Erwin Anac, agtawen ti 46, naasawaan, construction worker ken residente ti Barangay 7 Caruan iti ili ti Pasuquin, Erwin Bugaoisan, agtawen ti 54, naasawaan, mannalon ken John Roger Bugaoisan, agtawen ti 35, naasawaan, mannalon nga agpada a residente ti Barangay 28 Surong iti nasao nga ili.
Inbatadna a natiliw dagiti suspek kalpasan a naaktuaran dagiti otoridad nga agay-ayam dagitoy ti tong-its.
Gapu iti daytoy, nakumpiskar ti 52 a pedaso a playing card, maysa a plastic table, dua a monobloc chairs, 2,065 a pisos a mapapati a nausar kas pusta dagiti suspek ken dadduma pay a gambling paraphernalia.
Kabayatanna, bayat a maisursurat daytoy a damag ket manarimaan ti pannakaiproseso ti kaso a maipila kontra kadagiti tallo a suspek gapu iti panaglabsingda iti Presidential Decree 1602 wenno Illegal Gambling Law.
