LAOAG CITY – Natiliw dagiti tallo nga inidibidual a nagay-ayam ti Pool Pchas Game iti Brgy. Pacifico iti ili ti Marcos.
Binigbig ni PCapt. Jhonveil Maramag dagiti natiliw nga isuda Jerry Getteng y Cala-Cala, agtawen ti 44, naasawaan ken residente iti Brgy. Catagtaguen iti ili ti Banna, Salvador Lorenzo y Colcol, agtawen ti 33, naasawaan ken residente iti Brg. Escoda, Marcos ken ni Julievic Reyes y Malinay, agtawen ti 35 ken residente iti Brgy Pacifico iti metlaeng ili ti Marcos ken isuna ti agtagikua ti pool.
Kuna ni Maramag a namunganay ti pannakatiliw dagiti maseknan kalpasan nga adda ti naipadanon a report iti biang ti PNP mainaig kadagiti agay-ayam ti pool iti Brgy. Pacifico.
Gapu iti daytoy, inbatad na a nagresponde da a dagus ket dita a naduktalan ti panagay-ayam dagitoy ken adda ti taya na.
Nakumpiskar ti maysa a pool table, uppat a pool cue stick, tallo a pool stick case, maysa a set ti set pool Pichas, dua a billiard chalkken ti pusta nga agdagup ti 4,130 a pisos.
Nagtalinaed iti kustodyar ti PNP-Marcos dagiti nasao nga inbidual bayat a maisagsagana ti kaso a panaglabsing ti PD1602 wenno ti anti illegal gambling law kontra kadagitoy.
