LAOAG CITY – Tallo nga indibidual pakairamanan ti maysa a kameng ti PNP dagiti natiliw gapu iti iligal a panagsusugal iti Brgy. Balaoai iti ili ti Pagudpud.
Daytoy ti kinumpirmaran ni PLt. Wyrlo Gatoc, ti mangidadaulo iti CIDG-Ilocos Norte.
Binigbig ni Gatoc dagiti natiliw nga isuda Rosemarie dela Cruz, Jenny Calventas ken ti kameng ti PNP-Pagudpud a ni Police Staff Sgt. Julius Cesar Tagle.
Kuna na a namunganay ti pannakatiliw dagiti suspek kalpasan nga adda ti concerned citizen a nangireport iti kapulisan nga adda ti agsusugal iti nasao a barangay.
Gapu iti daytoy, dagus a nagresponde ti kapulisan nu sadino a naaktoan nga agay-ayam ti tong-its dagiti suspek.
Inpakaammo ni Gatoc a nakumpiskar ti maysa a set ti baraha ken nasurok lima a ribo a pisos a pusta dagiti maseknan.
Nagtalinaed iti kustodyar ti PNP dagiti suspek bayat a maisagsagana ti maipila a kaso kontra kadakuada.
