LAOAG CITY – Inbakwit dagiti otoridad ti agarop 60 ribo a tattao manipod iti probinsya ti Guandong idiay China kalpasan ti sumagmamano nga aldaw a panagtudtudo na a nangitunda ti pannakalayos iti nadakamat a lugar.
Basar iti report, addan ti tallo a tattao a kumpirmado a natay idinto a 11 a sabsabali dagiti mapukpukaw gapu iti insidente.
Naamoan a naiget a monmonitoren dagiti otoridad dagiti sumagmamano a dadakkel a karayan gapu iti kangato unayen ti lebel ti danom.
Ti Guangdong ket paset ti low-lying Pearl River delta a masansan a malaylayos gapu iti panagngato ti lebel ti danom iti baybay ken karayan.
Malaksid iti Guandong, ket karaman pay a nalayos dagiti babassit a ciudad kas iti Shaoguan ken Heyuan.
Nakanselar payen ti flights iti Baiyun International Airport iti Guangzhou gapu iti agtultuloy a panagtudtudo na ti napigsa idinto a napaserraan paylaeng dagiti pagadalan iti tallo a ciudad.
