LAOAG CITY – Inbatad ni Police Executive MSgt. Wenceslao Villafor iti ili ti Pagudpud a tallo nga inidibidual dagiti nasalamaan iti nasao nga ili gapu iti iligal a panagibiyahe ti baboy.
Binigbig ni Villafor dagiti suspek nga isuda Marcial Ramirez, agtawen ti 37, driver ken residente iti Poblacion, San Vicente, Ilocos Sur, Rogelio Sagun, agtawen ti 26 kenni Joel Pablo, agtawen ti 30, agpada dagitoy nga helper ken tubo iti Mangaldan, Pangasinan ngem agdama dagitoy nga agnanaed iti Brgy. Sagpat, Ilocos Sur.
Segun ken ni Villafor, linaon ti truck dagiti maseknan ti 69 a baboy.
Kuna na a basar iti palawag ti driver a ni Ramirez ket nagatang da dagiti baboy iti ili ti Pinili ken iti ili ti Paoay.
Daytoy ket maikanniwas iti inpresentar da a dokumento nu sadino a maibagbaga nga iti Venvi iti ili ili ti San Nicolas ti naggapoan dagiti dingwen.
Immuna iti daytoy, inpakaammo ni Villaflor a dagiti baboy ket plano dagiti maseknan nga ibiyahe iti probinsya ti Isabela.
Nagtalinaed iti kustodyar ti PNP dagiti tallo nga indibidual ken manamnama a mapilaan dagitoy ti kaso a panaglabsing ti Article 172 ti Revised Penal Code wenno ti Falscification of documents by Private Inidividuals.
Maipalagip a naiget a mabanbanatayan ti panagibiyahe ti baboy ditoy probinsya gapu iti pangta ti African Swine Fever (ASF).
