LAOAG CITY – Naideklarar kas invalid iti Sangguniang Panlungsod ti tallo nga ordinansa a pinutar ti Barangay 3 Nuestra Seniora del Rosario ditoy siudad ti Laoag.
Segun iti Chairman ti Committee on Laws, dagitoy ket ordinansa a mang-regulate ti operasion ti videoke, pannakaipawil ti panaglako ti arak kadagiti menor de edad ken ordinansa a mangipatungpal ti curfew hour.
Inbatadna a basar iti linteg ditoy pagilian, awan ti karbengan ti maysa a barangay a mangipataw ti pannakaibalud kas maysa a pannusa iti maysa nga indibidual.
Inlawlawagna a saan a nainkalintegan a dumanon iti sumurok maysa a ribu a pisos ti multa dagiti indibidual nga agsalungasing iti paglintegan ti maysa a barangay.
Kunana a saan pay a mabalin a mandaren dagiti residente a mangala ti permit sakbay a maipalubos ti pannakausar ti videoke.
Gapu iti daytoy, inrekomendar ti konseho nga ideklarar nga invalid dagitoy nga ordinansa.
Kabayatanna, inrakurak ti Presiding Officer a kasapulan ti seminar dagiti barangay officials mainaig iti umno a panagaramid kadagiti resolusion ken ordinansa ti barangay tapno maliklikan ti pannaka-invalid dagiti maipasa iti konseho.
