LAOAG CITY – Adda ti tallo nga ubbing a nakaptan ti sakit a dengue iti ili ti Pinili idi bolan ti Mayo.
Daytoy ti inpakaammo ni Dr. Agnes Barlahan, ti municipal health officer iti nasao nga ili.
Segun ken ni Barlahan, agkakapamilya iti Sitio Marungay iti Brgy. Puzol dagiti nakaptan ti nasao a sakit.
Kuna na a basar iti naiwayat nga imbestigasyon ken posible nga iti masiterya dagiti mula a masibsibugan ken saan maipan iti init ti nagumokan ti lamok.
Gapu iti daytoy, kuna na a napili ti Brgy. Puzol a pakaiyuswatan ti Oplan Dalus kontra Dengue babaen kadagiti kameng ti PNP, KKDAT, barangay officials, tanod ken dadduma pay a maseknan nga opisyal.
Immunan nga inpakammo ti municipal health officer a ti tallo a dengue case ket isu dagiti kaunaan a naimaldit a kaso ita a tawen.
