LAOAG CITY – Kinumpirmaran ni F/Supt. Roxanne Parado, Provincial Fire Marshal ti Bureau of Fire Protection ditoy probinsia nga adda ti nauram a maysa a pagtaengan iti Brgy. 15 iti ili ti Bacarra iti baet ti iduduprak ti Bagyo Julian.
Segun kenkuana, basar iti inwayatda nga imbestigasion ket rumrummuar nga electrical wiring ti makaigapu ti pannakauram iti maikadua a kadsaaran ti nasao a pagtaengan.
Inbatad ni F/Supt. Parado nga adda pay ti napasamak nga uram iti maysa a resort iti Brgy. Saud iti ili ti Pagudpud no sadinno ket electrical wiring ti rumrummuar met a rason ti napasamak nga uram.
Malaksid iti daytoy, kunana nga adda pay maysa a pagtaengan ti nauram iti Brgy. 17 iti ili ti Vintar gapu iti nabaybay-an a nakasindi a kandela a naiparabaw iti durabox.
Inpalgakna nga adda ti naimaldit a maysa pay nga uram iti Brgy. Pasiocan iti ili ti Bacarra nga am-ammoen pay laeng dagiti otoridad ti namunganayan ti nasao nga uram.
Inlawlawagna a narigatan dagiti bumbero a napan nagresponde kadagiti nadakamat a nauraman gapu iti nakaro a layos a napasaran dagiti lugar gubuay iti Bagyo Julian.
Kabayatanna, agtultuloy ti panangiwayat ti Bureau of Fire Protection ti naun-uneg nga imbestigasion maipanggep kadagiti tallo a napasamak nga uram kabayatan ti isasaplit ti Bagyo Julian ditoy probinsia.
