LAOAG CITY – Tallo a tattao dagiti nagbalin a biktima ti budol-budol gang iti uneg a mismo ti dakkel a mall iti San Nicolas, Ilocos Norte.
Nabigbig dagiti biktima a da Shantelle Dumlao, agtawen ti 26, Barangay 7 iti ili ti San Nicolas Camille Antonio, agtawen ti 18, taga Barangay Capasan iti ili ti Dingras, ken ni Mirofe Canonisado, agtawen ti 35, taga Currimao.
Segun ti palawag dagiti biktima iti PNP-San Nicolas, adda ti maysa a lalaki a nakisarita kadakuada nga ited da dagiti cellphones ken kwarta da tapno sukatan na ti brandnew.
Nupay kasta, kalpasan a naala ti suspek dagiti cellphones ken kwarta dagiti biktima ket kellaat lattan a nagpukaw ken saanda pulosen a nakita.
Karaman kadagiti naitaray ti suspek ket ti maysa a pink Oppo A71 nga agbalor ti 7,990 a pisos a kukua ni Dumlao, vivo nga agbalor ti 9,999 a pisos a kukua ni Antonio ken ti 1,100 a pisos ni Canonisado.
Naamoan a ti suspek ket nabaked, mapatta-patta nga agtayag ti 5’7” ken adda tattoo na iti agsumbangir nga ima na.
Segun ti inisyal nga imbestigasyon, immunan nga adda ti dua nga empleado ti nasao a mall a nabiktima met laeng ti nasao a suspek no sadinno a dinawatan na ida ti sagdudua ribo a pisos da kasukat ti brandnew a cellphones ngem saan a napasamak.
