LAOAG CITY – Natiliw dagiti tallo nga indibidual a nagsusugal idinto a nakalibas ti dua a kakadwa iti Sitio Darungadong, Brgy. Catagtaguen iti ili ti Banna.
Daytoy ti inbatad ni Police Capt. Jackson Sugayen, ti chief of police iti ili ti Banna.
Segun ken ni Sugayen, dagiti suspek ket agpapada a residente iti nadakamat a barangay.
Kuna na nga agtultuloy ti panangan-anop da kadagiti dua a nakalibas.
Inpakaammo ni Sugayen a nakaawat da ti impormasyon seknan iti illegal a panagsusugal dagiti suspek iti lugar isut gapuna a dagus da a nagresponde no sadinno a ditoy a naaktwan da dagitoy nga agsusugal.
Innayon na a nakataray dagiti dua a suspek no sadinno nga innala ti maysa ti maipagarop a pusta da ken sumagmamano a pedaso ti baraha.
Karaman kadagiti nakumpiskar dagiti otoridad iti lugar ti 557 a pisos, pito a pedaso ti baraha, maysa a lamisaan ken walo a mono block a tugaw.
Malaksid iti daytoy, nakumpiskar pay dagiti otoridad iti ikot dagiti natiliw a tallo a suspek ti kwarta da nga umabot amin ti P3,904 a pisos.
Iti agdama, maisagsaganan ti reklamo a panaglabsing iti Republic Act (RA) 1602 wenno illegal a panagsusugal kontra kadagiti suspek.
