LAOAG CITY – Inrakurak ni Prime Minister Mwigulu Nchemba a kinanselar ti Tanzania ti panangselebrar ti Independence Day inton sumaruno a bulan usar dagiti pundo a gastosen nga imbes iti panangipasdek manen kadagiti imprastraktura a nadadael gapu iti riribuk iti eleksion.
Daytoy nga anunsio ket kalpasan ti panawagan nga agtitipon dagiti tattao inton Disiembre 9 tapno ipakita ti mainaig kadagiti panangpapatay a napasamak kalpasan ti pagriririan iti napalabas nga eleksion.
Mamati ti oposisyon a ginasgasut a tattao ti natay iti riribuk no sadinno a saan pay a nangipaay ti gobierno ti bilang dagiti pimmusay ken nag-set up ti commission of inquiry.
Nangabak ni Presidente Samia Suluhu Hassan iti panagbubutos nga addaan ti 98% a butos nga inladawan ti oposisyon kas “mockery of democracy.”
Naammoan a dagiti kangrunaan a kalabanna ket saanda a naartapan ti butos gapu ta ni Tundu Lissu ket nakabalud gapu kadagiti kaso ti treason a naglikudanna idinto a ti kandidatura ni Luhaga Mpina ket nagkedkedan kadagiti technical grounds.
Nangipatungpal ti gobierno ti internet blackout iti uneg ti lima nga aldaw manipud iti aldaw ti eleksion idi Oktubre 29 ken pinangtaanna ti asinoman a mangipapaay kadagiti ladawan manipud kadagiti protesta.
Kabayatanna, nagserbi ni Presidente Samia idi tawen 2021 kas kaunaan a babai a Presidente idiay Tanzania kalpasan ti pannakatay ni Presidente John Magufuli.
