LAOAG CITY – Ad-adda a makapasar dagiti tattao nga agus-usar iti medikal a cannabis para iti napaot nga ut-ot iti atrial fibrillation ken dadduma pay a kita ti heart arrhythmia no idasig kadagiti saan nga agus-usar.
Daytoy ti naduktalan ti panagadal a naipablaak iti European Heart Journal.
Nupay kasta, nakita dagiti agsuksukisok a ti datos maipapan iti medikal a cannabis ket agkurang pay laeng gapu kadagiti isyu ti legalidad ken kasapulan ti ad-adu pay a panangtingiting tapno suportaran dagiti naammoan.
Nakita pay dagiti agsuksukisok a saan a nasolbar iti panagadal no ti peggad ket espesipiko a mainaig iti panagsigarilio iti cannabis, panag-ingest kadagiti cannabis edibles wenno kombinasion dagitoy a dua.
Naammoan a ti sabali pay a kangrunaan a limitasion a nadlaw dagiti agsuksukisok ket saan a nabalinan ti panagadal a kitaen ti kakaro ti sakit, klinikal a pamay-an, panagsukimat iti dara ken dagiti banag iti estilo ti panagbiag nga amin dagitoy ket mabalin a makatulong iti ad-adu a peggad ti isyu iti puso iti panagusar ti cannabis.
Kabayatanna, uray nababa pay laeng ti peggad ti arrhythmia kadagiti agus-usar iti medikal a cannabis daytoy ket estadistikal a makaipapaay.
