LAOAG CITY – Kinumpirmaran ni Mr. Pedro Rex Aguinaldo, ti chief executive secretary iti ili ti Pasuquin nga inmadar ni Mayor Ferdinand Aguinaldo a temporaryo pay laeng a saan a mairuar dagiti taraken a baboy manipud iti ili da.
Segun kenkuana, daytoy ket maysa nga addang da tapno maliklikan ti posible a panagwaras ti African Swine Fever (ASF).
Inbatad na nga uray dagiti kabangibang nga ili ket mapawilan pay laeng nga agiserrek ti baboy iti Pasuquin.
Kuna pay ni Aguinaldo a dagiti meat vendors iti ili da ti aggatang ti baboy kadagiti hog raisers.
Mainaig iti daytoy, inlawlawag na a nasayaat met ti panagmonitor dagiti naestablisar a checkpoint kadagiti rumuar ken sumrek a baboy iti ili da.
Kabayatanna, mangnamnama a saan nga agbayag ti temporaryo a pannakaipawil ti pannakairuar ti baboy iti ili da.
