LAOAG CITY – Manamnama a maipila ti kaso a panaglabsing iti Presidential Decree 533 wenno qualified theft kontra iti maysa a lalaki idiay ili ti Bangui.
Nabigbig daytoy a ni Jay Mark Castro, agtawen ti 28, awanan asawa ken residente iti Barangay San Lorenzo iti nasao nga ili.
Daytoy ket kalpasan a maipagarop a tinakaw na ti baka ni Mr. Antonio Tolentino Jr., agtawen ti 42, mannalon, naasawan ken residente iti Barangay Masikil ti met laeng nadakamat nga ili.
Basar ti imbestigasyon, nakita ni Tolentino ti baka na iti katlatalonan nga asideg iti balay ni Mr. Roger Balbas, negosyante ken residente iti Barangay Manayon, Bangui.
Gapo iti daytoy, dagus a nareport iti PNP-Bangui ni Tolentino kalpasan a nakita na ti mapukpukaw a baka na iti kataltalonan.
Naamoan a maipagarop nga inlemmeng ni Castro ti baka iti public cemetery iti paset ti Barangay Abaca, Bangui sakbay nga inlako na kenni Balbas nga agbalor ti 32 a ribo a pisos.
Iti agdama ket nagtalinaed iti kustudiyar ti PNP-Bangui ti nasao a suspek.
