LAOAG CITY – Nalpasen a nabakunaan dagiti taraken nga aso manipod kadagiti 19 a barangay iti ili ti Solsona kagiddan ti maisaysayangkat nga house-to-house campaign ti Municipal Agricultural Office.
Segun ken ni Engr Ranison Narciso, mangidadaulo iti nasao a pangopisinaan, tallo laengen a barangay ti bisitaen da, karaman ditoy iti Barangay Sta. Ana, Manalpac ken Maananteng.
Kunana a daytoy ket tinawen a maisaysayangkat tapno maliklikan ti panagngato ti kaso ti rabies iti nasao nga ili.
Innayon ni Narciso a sipod idi enero 1 ita a tawen ket awan pay ti nairekord a nakagat wenno nagpositibo iti rabies.
Inpasigurado na nga agtultuloy ti panagbakuna da kadagiti taraken, kagiddan iti panangibalakad na manen iti panangitalo kadagiti aso tapno saan a mangpataud iti sabali pay a problema kas iti panagrugit da iti kalsada.
