LAOAG CITY – Manamnama ti pannakaisayangkat ti taripnong dagiti Sangguniang Kabataan Chairman iti ili ti San Nicolas.
Daytoy ket kalpasan nga adda dagiti umaayam ti nagkakabil kabayatan ti Basketball Tournament iti nagbaetan ti Brgy. 6 ken Brgy. 15 iti Mini Cultural Center iti nasao nga ili.
Segun ken ni P/Cpt. Randy Damo, Hepe ti San Nicolas Municipal Police Station, immuna a kimmabil ti maysa nga umaayam iti padana met laeng nga umaayam iti kalaban a barangay agingga a nagbinnara dagitoy.
Nupay kasta, saan a nailanad iti police report no asino kadagiti maseknan nga umaayam ti immuna kadakuada a nagkabil.
Inbatadna a dagus a napan nagresponde dagiti otoridad tapno maanawa dagiti dua nga umaayam ti basketball.
Inlawlawagna nga apaman a nakasangpet dagiti pulis iti lugar ket dagus met a nagtalna dagiti maseknan nga umaayam.
Kabayatanna, naammoan nga adda manen dagiti umaayam ti nagkakabil kabayatan ti panagay-ayamda ti basketball iti napalabas a tawen.
