LAOAG CITY – Agtultuloy nga umad-adu ti madangran gapu iti kumarkaro a sitwasyon ti bulkan.
Immunan nga inpakaammo ni Bombo International Correspondent Manny Pascua manipud idiay Hawaii nga adda ti dua a tattao a nadangran gapu ti agal-alburuto a bulkan ken maysa ditoy ti naikkatan ti saka.
Kuna na a nakabakwiten dagiti amin a tattao nga agnanaed idiay Leilani Estate ken Lanipuna Estate, Big Island, Hawaii mainaig pay laeng ti kinarisgu ti agal-alburuto nga Kilauea Volcano.
Segun kenni Pascua, adda ti dua a dadakkel nga helicopter ti naka-stand-by no inkaso nga adda pay dagiti pamilya a kasapulan a maibakwit ken iti kaabay a lugar ti Leilani ken Lanipuna Estates gapu iti agtultuloy a panagayus ti lava.
Kuna na nga awan met ti bengngeg a tattao idiay Big Island gapu ta saan da a kayat nga adda ti mapasamak a dakes kadakuada.
