LAOAG CITY – Posible a mabalbaliwan wenno maamendaran ti Tax Incentive Code ditoy siudad ti Laoag kangrunaanna kadagiti sumagmamano a probision.
Segun ken ni Sangguniang Panlungsod Member Bryan Alcid, babaen iti pannakaadal ti pannakaamendar ti nasao nga ordinansa ket ad-adu pay dagiti agpuunan ditoy siudad ti Laoag.
Inbatadna a nakalukat ti lokal a gobierno ditoy siudad para kadagiti negosiante tapno ad-adda pay a maallukoy dagitoy ken mapapigsa ti ekonomia.
Inlawlawagna a kasapulan a maamendaran ti Section 11 iti Laoag City Investment Incentive Code of 2007 tapno maipasigurado dagiti miembro ti Board’s Interest ket umdas a mangibagi iti agbalin a desisionda.
Kunana a basar iti naiyataday iti Section 11 ket ti meeting ken quorum iti Board ket masapol nga agsasarita uray maminsan iti kada kuarter tapno mapagnunumoan dagiti rumbeng a maaramid.
Innayonna a gagem pay ti Sangguniang Panlungsod ditoy siudad ti Laoag a maamendaran ti probision maipanggep iti pannaka-avail ti tax incentive no sadinno nga iti agdama ti nailanad iti nasao nga ordinansa ket dagiti laeng addaan ti 50 nga empleado kadagiti pasdek-negosio ken addaan ti capital ti 20 a milyon a pisos.
