LAOAG CITY – Inbatad ni Coach Ma. Theresa iti Region 6 a saanna a mailadawan ti ragsakna gapu ta iti umuna a gundaway a panag-coach na kada Kate Pardilla ken Thea Grace Clar ti chess iti Palarong Pambansa ket nakagun-od da ti gold medal, agpada iti Team and Individual Standard Chess Event- Elementary Girls.
Segun ken ni Kate Pardilla, Gold Medalist, Individual Standard Chess – Elementary Girls iti Region 6, rinugyan na ti agay-ayam ti chess idi Grade 3 wenno agtawen ti 8 nga ita ket agtawenen ti 11.
Inkari na nga itultuloy na ti agay-ayam ti chess babaen ti suporta dagiti nagannak, coaches ken papagayam na.
Mainaig iti daytoy, nagyaman met ni Thea Grace Clar iti Diyos, kasta pay ti coach na nga isuda ti kangrunaan a timmulong kenkuana tapno agballigi ken makagun-od ti gold medal para iti ay-ayam a chess.
Kuna na nga agtawen paylaeng ti 5 wenno Grade 1 idi rugyan na ti agay-ayam ti chess a ti ama na ti mismo a coach na.
