LAOAG CITY – Nagengkwentro ti kampo ni Laoag City Vice Mayor Vicentito Lazo ken ti grupo ni Sang. Panlungsod Member RJ Fariñas kabayatan ti panagkampanya iti Barangay Mangato ditoy ciudad ti Laoag.
Segun kenni Konsehal RJ, kabayatan ti house-to-house campaign da iti Barangay Mangato-B ditoy ciudad ti Laoag ket timmawag kenkuana ti kabsat na a nangibaga a dumanon isuna iti nasao a barangay.
Inbatad na a ti inbaga kenkuana ti kabsat na ket sabaten na ida gapo ta maipagarop nga adda ti sumursurot kadagitoy bayat ti panagkampanya da manipud pay iti NWU agingga a simrek da iti Barangay Mangato.
Inlawlawag na nga iti makadanon iti boundary ti Barangay Mangato A ken B ket insardeng na ti lugan na ngem idi bimmaba iti lugan na ket bimmaba met ni Vice Mayor Vicentito Lazo.
Kunana a ditoy a sinaludsod na iti grupo ni Lazo no apay a sursuruten da ti ama na a ni dati a Mayor Roger Fariñas ngem ditoy metten nga adda ti nabara a panagsinnungbat da dati a mayor Fariñas ken ti bise mayor Lazo.
Inpetteng na a kabayatan daytoy, adda ti dua a lalaki a nakasibilyan a rimuar iti lugan nga armado ti paltog ken maipagarop nga insawang dagitoy a mabalin da a paputukan ti grupo ti Fariñas.
Dinakamat na a ditoy a nag-video isuna ken inyam-ammo na ti bagbagi na a maysa a konsehal ditoy ciudad.
Patien na a ti kalikagom ni Lazo ket mang-harass iti grupo da isut gapo na a saan da nga agsanod gapo ta saan a maiparbeng ti inaramid ti grupo ti bise mayor.
Malaksid iti daytoy, inbatad ni Konsehal RJ a dagiti dua a lugan a sumursurot ket nagsardeng iti sangwanan ti likudan ti lugan ti ama na a ni dati Mayor Fariñas.
Kalpasan daytoy, kunana a dimteng dagiti kameng ti PNP ngem bimmaba manen manipud iti lugan ni Lazo ken maipagarop a darupen na latta ti grupo ti Fariñas.
Mainaig iti daytoy, kunana a nasakit ti na gapo ta ti dinakamat na a dua nga immasot ti paltog ket saan a tiniliw dagiti pulis iti laksid nga inpakita na pay ti video.
Kabayatanna, desidido ti konsehal a mangipial ti kaso kontra kenni Lazo ken dagiti dua a lallaki nga armado ti paltog.
