LAOAG CITY – Manamnama nga agsanay nga insigida dagiti atleta iti team Laoag para iti Palarong Pambansa apaman a maawat da ti pinal a listaan manipod iti Rehiyon Uno.
Daytoy ti inbatad ni Mr. Hipolito Salva, ti mangidadaulo iti Local Youth and Sports Development office ditoy ciudad ti Laoag.
Inrakurak na a ti listaan a manarimaan ur-urnusen ti Regional Office ket isu iti pakakitaan ti nagan dagiti atleta nga agay-ayam ti Palarong Pambansa.
Iti agdama, kuna ni Salva a naipaayan paylaeng ti gundaway dagiti atleta a makainana, makadwa ti pamilya da ken agatendar iti klase da.
Mainaig iti daytoy, inlawlawag ni Salva a saan amin a nakagun-od ti gold medal ket agay-ayam iti Palarong Pambasa.
Innayon a dagiti napili kas best performing team nga schools division iti tunggal ay-ayam ti makipaset iti Palarong Pambansa.
Inpakaammo na a 80% kadagiti nakaawat ti gold medal manipod iti team Laoag ket makipartisipar ti Palarong Pambansa gapu ta nabigbig ti Schools Division ditoy Ciudad ti Laoag kas best performing group ti gymnastics, arnis, wushu, ken taekwondo.
