LAOAG CITY – Balligi ti naisayangkat nga inauguration ken turn-over ti Ilocos Norte College of Arts and Trades TechBus a proyekto ti Batch 1996 ti nasao a pagadalan.
Inbatad ti Presidente ti Ilocos Norte College of Arts and Trades Batch 1996 a ni Dr. Micheal Pol Bueno a napapanunotda daytoy a proyekto gapu iti kalikagumda a matulongan dagiti agad-adal a marigrigat ken saan a maud-udi dagitoy maipapan ti panagadalda.
Inlawlawagna a ti naaramid a TechBus ket dati a nabaybay-an a bus no sadino maus-usar daytoy idi kas school bus nga usarenda a mapan kadagiti pakaiyus-uswatan ti kompetision ken seminar.
Nupay kasta, kunana a gapu ta masayangan dagitoy ket napununotda nga ipreserba ti school bus nga inaramidda kas maysa a computer hub.
Inpakaammona nga agarup 1 milyon a pisos ti gatadna ti nasao a proyekto no sadino ket addaan daytoy ti 6 a desktop ken 6 a laptop nga isu ti maikadua a proyekto ti nasao a batch iti nasao a pagadalan.
Innayonna nga ibaklay ti Batch 1996 ti panagbayad ti internet nga usaren iti TechBus idinto a ti pagadalan ti mangibaklay ti panagbayad ti mausar a kuriente.
