LAOAG CITY – Nangisayangkat ti technical delegation manipud ti ASEAN Athletic Association ti inspeksion iti mannarimaan a maipaspasdek a Ferdinand Edralin Marcos Stadium ditoy siudad ti Laoag.
Segun ken ni Mrs. Helen Rose Domingo, Ilocos Norte Sports Development Officer, kinuyog a mismo ni Gob. Matthew Marcos Manotoc dagiti pannakabagi ti ASEAN a nangiyuswat ti inspeksion.
Kunana a nakita ti gobernador ti panangrukod ti technical delegation iti stadium rason a nakitana no ania dagiti nasken a mapasayaat ken no ania dagiti nasken a maaramid iti pannakaipan ti rubberized track oval.
Mainaig iti daytoy, kunana a naiget ti direktiba ti gobernador a masapul a masurot amin a pagalagadan nga inbatad dagiti maseknan.
Innayon ni Domingo a paset daytoy iti naiget a kalikagum ni Gob. Manotoc a maipaayan ti Marcos Stadium iti international certification.
Maipalagip a kuna ni Engr. Paul Anthony Layaoen ti Resident Engineer ti Ferdinand E. Marcos Stadium nga umabot iti 12 a ribu ti kapasidad ti hybrid stadium park nga addaan ti kalawa a 2 nga ektarya ken napundoan ti nasurok maysa a bilyon a pisos.
