LAOAG CITY – Naipaayan ti gundaway dagiti telephone companies ken cables a mangdalus iti linyada.
Daytoy ti inpakaammo ni Mr. Cipriano “Perry” Martinez, Acting General Manager ti Ilocos Norte Electric Cooperative wenno INEC.
Inlawlawagna a kalpasan ti panangirubuatda iti “Operation Baklas” ket kinataripnonda dagiti maseknan.
Kunana a ti nasao a taripnong ket inatendaran ni Gob. Matthew Marcos Manotoc ken ditoy a napagtutulagan a dagiti maseknan a kompania ti mangdalus ti linya tapno saan a ti Ilocos Norte Electric Cooperative ti mangikkat.
Inbatadna a kalpasan ti naipaay kadagitoy a gundaway ket sumrek manen ti kooperatiba ken aniaman a makitada a saan a naurnus ket putulenda.
Segun ken ni Martinez, pinaiyunada a madalusan dagiti adda iti sakop ditoy siudad ti Laoag ken iti ili ti San Nicolas.
Kunana a makabulan agingga iti dua a bulan ti naipaay kadagitoy a pawayway ken kalpasanna ket sublianan ti Ilocos Norte Electric Cooperative dagitoy a lugar.
Inbatadna nga adda ti naited a “timeline” para iti panangdalus dagiti maseknan iti linya dagitoy iti maysa a lugar.
Inlawlawagna nga inikkanda laeng ti tsansa dagiti maseknan a kompania a mangdalus iti linyada tapno saan a basta maputulan dagiti subscribers dagitoy.
Innayonna a ti Ilocos Norte Electric Cooperative ti agputul sigurado a masapul ti panagpalawag dagiti kompania kadagiti subscribers idinto a no isuda a mismo ti mangdalus iti linyada ket mabalinda a pakaammoan iti nasapsapa a gundaway dagiti subscribers.
