LAOAG CITY – Kinumpirmaran ni Dr. Loida Valenzuela, Provincial Veterinarian ditoy Ilocos Norte nga inaprobaran ni Gov. Matthew Marcos Manotoc ti panagkiddawda iti temporario a pannakaipawil ti pannakaiserrek ti kalding ditoy probinsia.
Segun ken ni Dr. Valenzuela, daytoy ket kalpasan a naammoanda nga addan dagiti nagpositibo a kalding manipud idiay Marinduque ken Pampanga iti Q Fever.
Inbatadna a babaen iti daytoy a wagas ket maliklikan iti panagwaras iti nasao a sakit.
Inlawlawagna a napeggad daytoy isu a masapol laeng a mangipatungpalda ti naiget a pagannurutan nangruna daytoy a bacterial disease ket makaakar iti tao.
Mainaig iti daytoy, kunana nga adda ti impormasion a naipadanon iti opisinada a naiserrek ditoy probinsia a kalding manipud iti National Agency ti Department of Agriculture.
Nupay kasta, inpalgakna nga iyur-urayda pay laeng ti advisory manipud iti national pakaseknan iti nasao a damag.
Kabayatanna, inlawlawagna a ti Q Fever ket maysa a sakit gapu iti bacterial pathogen Coxiella burnetii a mabalin a maiyakar iti tao manipud kadagiti dingwen.
Iti agdama, naragsak nga inpakaammo ti Provincial Veterinarian nga awan ti kaso ti Q Fever iti intero a probinsia.
