LAOAG CITY – Kinumpirmaran ni Police Lt. Ashley Cacayorin, deputy chief of police ti PNP San Nicolas, a temporaryo a nasuspenso ti panagpastrek iti mismo a kuerpo ti pulisya.
Daytoy ket kalpasan a nagpositibo iti COVID-19 ti maysa a kameng ti PNP San Nicolas a tubo iti Bangar, La Union.
Inlawlawag na nga idi Abril 26 ti bigat a panagsisinnukat iti duty, naobserbaran da a saan a nasaranta ti maseknan.
Kuna ni Cacayorin a naggurigor ti maseknan nga idi bigat ti Abril 27 rason a naibalakad kenkuana nga agisolate iti maikadua a kadsaaran ti PNP station.
Inbatad na a gapu ta saan a bumaba ti gurigor ti maseknan ket inpakaammo da iti Municipal Health Office ket naipan iti barangay quarantine facility iti Brgy. 3 iti nasao nga ili.
Naipadalan ti maseknan iti swab test ket nagpositibo iti COVID-19 idi Abril 30 babaen ti panangipakaammo dagiti staff ti MHO.
Gapu iti daytoy, nakaisolate dagiti nakageddan iti panagduty ti maseknan agraman dagiti nakadetine iti PNP station.
Kuna na a naibalakad kadagiti adda iti ruwar a kameng ti PNP nga agisolate iti pagtaengan da.
Inbatad ni Cacayorin a limitado iti panaggaraw da nangruna no addaan iti emerhensiya.
Inadmitir na nga isuda manen a team iti nagisolate iti PNP station iti kallabes.
