LAOAG CITY – Saan a pinalabes ni tennis legend Rafael Nadal ti panagballigi ni Pinay tennis star Alex Eala kontra ken ni World No. 25 Jelena Ostapenko iti Miami Open 2nd round.
Insigida a kinablaawan ti career Golden Slam winner ti Pinay star ken kunana a daytoy ket dakkel a balligina ken ti Pilipinas.
Nakaaramid ti baro a rekord ni Eala kalpasan nga inabakna ni Ostapenko iti iskor a 7-6, 7-5 ken nagun-od ti kadakkelan a balligi iti karerana sipod idi nagbalin daytoy a professional tennis player.
Naammoan a sakbay iti daytoy ket inabak pay ni Eala ni World No. 73 Katie Volynets iti agtultuloy a torneo.
Iti agdama, ni Eala ket ranked No. 140 iti Women’s Tennis Association (WTA)
Ti Latvian star nga inabakna ket dati a 2017 French Open champion.
Kabayatanna, saan pay a nadakamat no asino ti sumaruno a makabinnalubalna iti nasao a torneo.
